Durante o mes de maio, no Centro Arqueolóxico do Barbanza poderedes visitar a exposición temporal Louza de Bamio. Memoria, mulleres e territorio, no noso horario habitual.

A mostra achega ao público a recuperación dunha tradición oleira hoxe desaparecida, propia da parroquia de San Xinés de Bamio (Vilagarcía de Arousa), situada na marxe sur do estuario do Ulla. Este oficio forma parte da nosa identidade e reflicte a forte conexión entre a paisaxe litoral e as tradicións rurais, urbanas e mariñas que foron modelando o territorio ao longo do tempo.

Louza de Bamio é un proxecto desenvolvido no marco de Louceir@s de Bamio, unha iniciativa conxunta entre a Asociación de Mulleres Rurais de Bamio e a Universidade de Vigo, iniciada no ano 2016 co obxectivo de recuperar a memoria social do traballo co barro. A exposición está composta por seis paneis que percorren a historia e as técnicas desta tradición, salientando o papel fundamental das mulleres na transmisión deste saber.

A mostra complétase coa exhibición de pezas orixinais desta tradición oleira, pertencentes á colección do Museo do Pobo Galego e a materiais recuperados polo propio proxecto, permitindo achegarse á beleza e funcionalidade dun oficio que desapareceu a finais dos anos 40 pero que deixou unha fonda pegada na nosa cultura.

Unha proposta para mergullarse no pasado, reflexionar sobre a transformación do rural e recoñecer a importancia da memoria colectiva e do patrimonio como parte esencial da nosa identidade.